Talawan Og patay na-embalmer

CEBU, Philippines - Tawo nga hadlokan kaayo’g minatay, nahimo hinuon nga embalmer kon tigbalsamar og mga patay.

Kini maoy nahitabo ni Ulegario Ycot, 54-anyos nga nagpuyo sa Barangay Poblacion, Tuburan, usa ka lungsod sa amihanang-kasadpang bahin sa Sugbo.

Matud ni Ycot nga puwerte’ng pagkahadlokan niya’g minatay sukad pa sa iyang pagkabata. Bisan gud ang pagtan-aw og minatay iya kini nga likayan kay ang dagway sa patay diha sulod sa lungon dugay kaayo’ng mahanaw sa iyang huna-huna, ilabi na inigkagabii.

Si Ycot nga naila sa angga nga Ulong ngadto sa iyang mga barkada wala g’yud magtuo nga sa iyang kataslakan og minatay mahimo na hinuon siya nga tigbalsamar og patay.

Diha’ng 21-anyos na si Ycot nanimpalad siya og panarbaho didto sa Manila pinaagi sa pagkuyog sa mga silingan niya’ng mga construction worker. Kay igo ra man siya nga nakahuman og third year high school naglisod siya’g pangita’g maayo’ng trabaho.

Paglabay sa usa ka tuig, gikapoyan na si Ycot pagtrabaho isip construction worker kay gawas nga bug-at, mabuwad pa gayud kanunay sa init sa adlaw ilabi na kun bag-o nga gitukod ang building ang gitrabaho.

Nabasahan ni Ycot sa mantalaan nga adunay “wanted utility worker” ug iya’ng giaplayan. Gibuligan si Ycot sa kapalaran kay nadawat siya apan wala niya palandonga nga ang iyang trabaho utility worker sa punerarya.

Gikan niadto, mga lungon ug patay’ng lawas na sa mga tawo ang kanunay niya’ng makita kada adlaw. Puwerte gayud niya nga pagmahay nga mi-resign sa construction company. Misuway siya’g hangyo nga mobalik apan nasuko na kang Ycot ang ilang foreman ug dili na modawat kaniya mao nga gihugtan na lang ni Ycot ang iyang bakus ug giagwanta ang kahadlok sa minatay.

Tulo ka buwan g’yud ang pag-antos ni Ycot hangtod nga naanad na lang siya sa iyang sitwasyon. Miabot ang panahon nga nahimo si Ycot nga katabang sa embalmer hangtod nga nakat-on siya pagbalsamar og minatay.

Si Ulong nahimo nga tigbalsamar og minatay sulod sa 15 ka tuig. Pagpauli niya sa Sugbo nag-drive na lang siya’g PUJ nga biyahe Danao-Cebu nga rota.  (BANAT NEWS)