CEBU, Philippines - Patay ang usa ka lalaki human nga mabangga ang iyang motor ngadto sa usa ka bus diha sa Barangay Poblacion sa lungsod sa Aloguinsan.
Ang namatay naila nga si Roy Dealagdon, 23, molupyo sa Purok 5 sa Poblacion Aloguinsan.
Samtang ang drayber sa bus naila nga si Alejandro Nator, 58, molupyo sa Barangay Malolos sa lungsod sa Barili. Giingong nawad-an og kontrol sa manobela ang biktima hinungdan nga nabangga kini sa bus nga gimaneho ni Nator.
Daling gitabang ang biktima sa iyang mga kaliwat ug gidala kini ngadto sa Pinamungajan District Hospital apan gideklarar na kini nga dead on arrival. Ang drayber sa bus mitahan sa iyang kaugalingon sa kapolisan human sa maong hitabo. (BANAT NEWS)