PNP, BFP nangandam sa Nov.1 ug 2

CEBU, Philippines - Magpakatap og 300 ka mga pulis ang kapulisan sa Police Regional Office -7 karong umaabot nga pagsaulog sa adlaw sa mga Santos ug adlaw sa mga minatay.

Matud pa ni Superintendent Renato Dugan ang hepe sa Public Information Office sa PRO-7 nga ipakatap sila sa mga lugar lukop rehiyon ilabina sa mga lugar nga dunay baga nga mga tawo nga mobisita atol sa duha ka adlaw nga kalihokan.

Plano sa kapulisan nga sa Oktubre 30 ipaubos sa “heightened alert” ang rehiyon aron masiguro nga sayo pa lang higpit na ang seguridad.

Si Superintendent Anthony Bagarinao ang deputy director for operations sa Cebu Provincial Police Office nagkanayon nga naka “pokus” sila sa 134 ka mga sam-ang sa probinsya sa Sugbo, 68 ka mga Public Assistance Centers ang plano nga ipakatap sa probinsya.

Motabang usab ang tulo ka libo ka mga “force multipliers” sa tibuok probinsya alang sa pagpatuman sa kahapsay ug kalinaw.

Samtang ang deputy chief sa Cebu City Police Office, Supt. Alet Virtucio nagkanayon nga nakigtagbo  na sila sa lokal nga opisyal sa dakbayan sa Sugbo alang sa mga plano sa seguridad.

Dunay mga close circuit television (CCTV) cameras nga ipamutang sa palibot sa dakbayan.  Gipanawagan sa kapulisan ang publiko nga likayan lang ang pagdala sa mga mahalong mga gamit paingon sa mga sam-ang aron dili matintal ang mga badlongon.

Samtang ang Bureau of Fire Protection Cebu City subsob na usab ang gihimong pagpangandam alang sa maong kalihukan.

Matud ni Cebu City Fire Marshall Chief Inspector Rogelio Bongabong Jr.,  gisugdan na nila og scheduling sa mga fire trucks pinaagi sa ilang mga sub-station commanders.

Gimandoan na usab ang inspectors nga susihon pagbalik ang mga giisyu nga mga fire extinguisher sa mga barangay.

Kadtong mamauli sa probinsya, giawhag sa BFP nga siguraduhon g’yud nga patay ang ilang plangka ug ipahibalo ngadto sa kasaligan nga silingan nga molakaw aron panahon sa emerhensiya makapahibalo kini kanila. (Jojo Ugdol ug Decemay P. Padilla/EIM)(BANAT NEWS)