CEBU, Philippines - Gipasakaan na og kaso ang pito sa napulo ka nadakpan sa kapolisan sa mga lungsod sa Alcoy ug Dalaguete niadtong Sabado.
Si Assistant Provincial Prosecutor Petronio Elesterio wala’y girekomendar nga piyansa batok nila ni Mario Coronel, 49, sa kasong illegal possession of explosives ug Alvin Coronel, 20, sa kasong illegal possession of dangerous drugs.
Samtang sila si Vicente Asenjo, Randi Belda, Lucino Quevido, Michael Manriquez ug Mario Coronel gipasakaan usab og kasong illegal possession of firearms and ammunitions.
Piyansa nga P175,000 ang girekomendar matag usa nilang Asenjo, Belda, Quevido, Manriquez ug Mario.
Ang laing tulo nga dinakpan nga sila si Erwin Amandoron, 41 ug bana sa kapitan sa Nalhub, Dalaguete; Hermigildo Capal, 65 ug Timoteo Amaca, 35 ug konsehal sa Nug-as, Alcoy ang ipaubos pa sa preliminary investigation diin gitagaan sila og pito ka adlaw sa pagtubag sa pasangil. Usa ka joint operation ang gipahigayon sa kapolisan hinungdan sa pagkasikop sa napulo ug ang pagkamatay nilang Jojo Gañolon, Jaylhone Mercado ug Lorenzo Coronel sa pinusilay.
Si Gañolon giingong lider sa gun-for-hire group nga naglihok sa habagatang bahin sa probinsiya sa Sugbo ug nasikop sa kaso sa drugas apan naka-eskapo niadtong 2011 dihang nitambong sa husay sa korte sa Argao.
Nakuha sa kapolisan ang nagkalain-laing armas, granada, magazines, bala, marijuana ug shabu atol sa operasyon.
Sa 11 ka search warrants nga dala sa kapolisan, upat niini ang wala nadakpi nga sila si Jonathan Moran, John Michael Mejares, William Salonoy ug Arnel Bacatan kinsa gilambigit sa mga kaso sa drugas, pagpanulis, pagpangilkil ug pagpatay. (BANAT NEWS)