Dalaga naghikog sa madre de cacao
CEBU, Philippines – Patay na nga nakit-an sa iyang uyoan ang 18-anyos nga pag-umangkon nga babaye human naghikog ug nagbitay sa punoan sa madre de cacao sa barangay Tubod, San Fernando niadtong Martes sa buntag. Ang nagpakamatay naila nga si Jonafe Embolode, tinun-an sa high school ug nagpuyo sa maong lugar.
Matud ni PO1 Erwin Oyao sa San Fernando Police nga nahinabi sa Banat News nga katapusang nakita nga buhi si Emboledo hapon sa Lunes dihang kini gisugo sa iyang ginikanan sa pagpangita og kahoy para sugnod.
Apan nagabii na lang wala pa niuli sa ilang balay ug gipangita na sa iyang ginikanan.
Sayo sa buntag sa Martes ang uyoan nga nanugway og mga hayop sa kasagbutan nga bahin ang unang nakakita sa patay nga lawas sa iyang pag-umangkon nga nagbitay sa madre de cacao gamit ang scarp ug wala na’y kinabuhi.
Nakuha sa pamilya ni Emboledo ang suicide note nga gibutang sa iyang bulsa. Kini nagkanayun nga gumikan sa iyang personal nga problema hinungdan nga siya nagpakamatay.
Sigun pa ni Oyao nga wala sab nasayud ang ginikanan sa 18-anyos og unsa ang problema niini apan matud ni Oyao usa ka hilumon ang maong batan-on. – /GMR) (BANAT NEWS)
- Latest
