Gipusil patay atubangan sa uyab

CEBU, Philippines – Atubangan sa iyang hinigugma gitusak-tusak sa bala ang usa ka lalaki sa sitio Tabok-Lamak, Yati, Liloan niadtong nakalabay nga gabii.

Ang biktima naila nga si Reymun De Guzman, 32, nagpuyo sa maong lugar samtang ang iyang hinigugma naila nga si Carla Ann Cueva, 28, taga Catarman, Liloan.

Matud ni PO1 Eden Pepito sa Liloan Police nga nahinabi sa Banat News nga samtang nag-estoryahanay si De Guzman kauban ang iyang hinigugma kalit lang nibutho ang usa ka lalaki nga nag-jacket ug dayun pusil sa makadaghan nga higayun.

Lima ka bala sa .45 caliber pistol ang nakuha sa kapolisan sa crime scene samtang lima sab ka samad ang naangkon sa biktima sa iyang kalawasan hinungdan sa iyang kamatayon.

Nakarekober sab ang kapolisan og .22 revolver nga gituohang iya sa biktima.

Si Pepito nibutyag nga dunay pending alias warrant ang biktima sa kasong grave threat nga gikompirmar usab ni PO1 Allen Lecciones, ang warrant server sa Liloan Police.

Sigun pa ni Lecciones nga buntag sa Sabado sa dihang iya unta nga gi-silbi ang warrant sa balay sa biktima apan wala niya naabti ug matud pa nakalakaw na.

“Seguro og nadakpan to nako siya sir, buhi pa seguro to siya,” matud ni Lecciones.

Nagpadayon ang imbestigasyon sa kapolisan sa maong lungsod aron pagtumbok sa responsable sa krimen. – /GMR) (BANAT NEWS)