Kalag nga nanghagis

CEBU, Philippines - Dili maayong moduaw sa lubong sa laing patay kun gikan naghatud og laing minatay. Tinuod ba ni nga pagtuo-tuo o dili?

Apan si Pat Watin usa ka negosyante nga una nang na-feature dinhi sa Banat News “Kalag-Kalag Special” miingon nga kaniadto dili siya motuo, apan nausab kini human siya mismo nakasinati og dili maayong tratamento gikan sa namatay na niyang bayaw.

Ang iyang bayaw nga usa ka kanhi sundalo namatay niadtong 1995 sa bayolenteng paagi diin usa siya sa mihatod niini sa tambalanan apan nakabsan gihapon kini sa kinabuhi. Niadtong 2001, dihay usa ka higayon nga mikuyog siya naghatud sa  usa ka minatay nga ilang silingan sa sementeryo diin gilubong ang iyang bayaw.

Human sa paglubong, nakahuna-huna siya pagduaw sa lubong sa iyang bayaw, apan nakurat siya sa iyang nakita.

Sumala pa niya, human siya nangayo og katahoran atubangan sa lubong sa bayaw ug gisultihan nga miuna na og lakaw ang iyang bana (igsuon sa namatay) nakadungog siya nga dunay linagubo sa iyang luyo nga sama og tingog sa maso nga gipukpok sa semento.

Apan sa iyang paglingi, walay laing tawo sa iyang nahimutangan. Sa pagbalik niya og atubang sa lubnganan sa bayaw nabantayan niya ang litrato niini nga nagsiga ang mata  nga mitutok kaniya.

“Pagtan-aw nako sa iyang litrato sa iyang lubong misiga man ang mata sa patay nga diha sa litrato,” matud pa niya.

Sunod niyang nabantayan nga dunay milagubo sa sud sa lubong hinungdan nga mikaratil siya og dagan. Sumala pa niya, tungod sa kahadlok, nagyawyaw siya sa iyang bayaw nga kini pay duawon mao pay masuko.

Tungod niini, nakaingon siya nga angay lang nga tuohan ang mga katiguwangan ilabi na ang ilang mga panultihon. Hinuon wa may mawala ba kung motuo niini. - /EIM (BANAT NEWS)