CEBU, Philippines - Nasikop sa kapolisan ang usa ka lalaki nga mitulis og disc jockey samtang ang biktima nagluwan og PUJ sa dalan Escario ning dakbayan sa Sugbo kaniadto’ng Biyernes sa buntag.
Ang nadakpan mao si James Canoy, 24-anyos nga taga Barangay Labangon ug maoy gitumbok nga mitulis ni Raffy Membreve, 22, nga taga Barangay Tisa, dakbayan sa Sugbo.
Diha nga miabot na ang PUJ sa dalan Escario, ang biktima kalit lang gitionan ni Canoy og ice pick dayon mideklarar siya nga tulis.
Nakuhaan ang biktima og cellphone nga Samsung S3 nga gidala sa tulisan nga puwerte’ng abtika nga milayat sa PUJ. Ang biktima nakabantay nga miagi ang patrol car sa Cebu City Police Station-2 mao nga misiyagit siya ug nanawag og tabang mao nga abtik nga gigukod sa kapolisan ang tulisan ug nadakpan.
Si Canoy anaa na karon natanggong sa bilanggoan ug giandaman na og kaso nga pagpanulis nga ipasaka adto sa fiskaliya ugma’ng adlawa. - /RUB (BANAT NEWS)