CEBU, Philippines - Nahulog sa kamot sa kapulisan ang usa ka level 2 drug pusher human sa usa ka buy-bust operation sa mga sakop sa City Anti-Illegal Drugs Special Operations Task Group (CAIDSOTG) sa Sitio Lower Lomar, Barangay T. Padilla, Cebu City. Ang nasikop mao si Aldrin Ylanan, alyas Cocoy, 44, nga nagpuyo sab sa maong lugar. Si Senior Inspector Eunil Avergonzado miingon nga duha ka semana nilang gipanid-an ang suspek.
Napalitan og usa ka paketeng shabu nga tag P200 ang poseur buyer gikan ni Ylanan hinungdan nga kini gisikop.
Sa pagsubay sa sulod sa panimalay niini, nakuha ‘sab sa mga operatiba ang dugang siyam ka gagmay nga pakete ug usa ka medium size nga paketeng may sud nga gidudahang shabu nga nagkantidad og P63, 720.
Gitanggong na sa Cebu City Police Office detention cell ang dinakpan nga pasakaan og kaso kalapasan sa R.A 9165, sec.5 ug 11.
Samtang nadakpan usab sa Barangay Kalawisan sa dakbayan sa Lapu-Lapu ang usa ka Niño "Kimpang" Amoin, residente sa Zone Pansat sa maong barangay.
Usa ka gamay’ng pakete sa shabu ang nakuha atol sa buy-bust ug laing siyam ka gagmay’ng pakete ug usa ka medium size pack sa ginadiling drugas , drug paraphernalia ug ang duha ka tag P100 nga marked money.
Ang duha gikatakdang pasakaan og kasong kalapasan sa Republic Act 9165 kon Comprehensive Dangerous Drug Acts of 2002. (BANAT NEWS)