Ihawan ipasubasta?

CEBU, Philippines - Nibahad ang kagamhanan sa dakbayan sa Mandaue nga ipasubasta ang ihawan sa dakbayan sa Sugbo kun dili mabayran ang buhis niini.

Matud ni Mandaue City Treasurer, Atty. Regal Oliva, nga gipadala na niya ang notice to collect taxes sa kagamhanan sa dakbayan sa Sugbo sa buhatan ni Mayor Michael Rama.

Gitataw ni Oliva nga gawas sa wala pagbayad og buhis sa kagamhanan sa dakbayan sa Sugbo sukad sa pagsugod sa pag-operate sa maong ihawan, wala pa gyud kini mokuha sa mga rekisito nga gikinahanglan.

Naglakip na niini ang sanitary permit, environmental clearance, Mayor’s Permit, fire clearance, sanitary permit ug uban pa nga gikinahanglan sa dili pa magsugod sa ilang operasyon.

Sa iyang bahin, ipasusi ni Rama kung may basehanan ba ang pagpaningil sa kagamhanan sa dakbayan sa Mandaue og buhis sa ihawan sa siyudad.

Kini human nasayud si Rama sa maong isyu dihang nahibalik siya gikan sa Hong Kong kagahapon.

“They should all remember we pass Mandaue, they pass Cebu City, why should be worry about it?....We should be helping, complimenting rather than fighting….Why I should be fighting with them?, I’m not going to run any position in Mandaue,” matud ni Rama.

Apan nakapa-ngutana si Rama nganong karon pa gipagawas ang isyu kabahin sa wala pagbayad og buhis sa dakbayan sa Sugbo nga unta dugay na man kini.

Ang Mandaue naningil og P2.9 milyones nga real property tax sulod sa 13 ka tuig nga operasyon sa ihawan sa Sugbo nga giingong nahisakop na sa barangay Subangdaku. (BANAT NEWS)