Mahalong gadgets, 14 nailad
CEBU, Philippines - Naghugop sa buhatan sa Theft and Robbery Section sa Cebu City Police Office ang 14 ka batan-ong professionals nga nagtrabaho sa lain-laing kompanya kinsa nangreklamo nga nailad sa usa ka 29-anyos nga lalaki nga gikatahong gikan pa sa dakbayan sa Taguig.
Matud ni Chief Insp. David Señor, hepe sa TRS, nga posibleng mahulog nga “large scale estafa” ang pwedeng mapasaka nila batok sa suspek nga si Darwin Romero nga taga San Francisco, Bagong Bario, Taguig City.
Sumala pa ni Señor nga mang-recruit ang suspek sa mga batan-on nga mahilig sa mga mahalong gadgets sama sa cellphone ug iPhone nga kini makahatag ug makabaligya sa barato lang nga presyo.
Ang suspek nagpaila nga ang pamilya toa sa gawas sa nasud ug igo lang kini mianhi sa Sugbo kay ganahan sa lugar ug nagpakita pa sa iyang passport.
Misaad pa ang suspek og mga freebies sa matag palit og tag-lima ka iPhone diin dunay pakapin nga usa ka iPhone.
Sa record sa kapulisan duna’y nakabayad og P90 mil, P50 mil, P20 mil ug P200 mil diin niabot og P1,006,000 ang tanan.
Ang ubang biktima nakahatag og daku nga bayad kay gusto nilang makakuha og daghan nga baratong item aron ila sab nga ibaligya.1 (BANAT NEWS)
- Latest
