Mga tinun-an naghithit
CEBU, Philippines - Pito ka menor de edad ang nasakpan sa ilang school administrator nga naghithit og marijuana sulod mismo sa ilang eskwelahan sa miaging semana.
Kini gikompirmar ni Cebu City Office for Substance Abuse Prevention for illegal drugs use head Alice Utlang. Ang mga pangalan sa mga high school nga estudyante ug pangan sa eskwelahan tuyong gitagoan sa Banat News alang sa ilang proteksyon.
Sigon pa ni Utlang nga ang lima niini ang first timers ug ang duha tulo na ka tuig nga mohithit og marijuana. Sa iyang pakighinabi sa mga menor, matud nila nga sa Danao nila nakuha ang supply sa maong marijuana.
Apan, sigon ni Utlang nga posibleng namakak ang mga bata kay nahadlok pagtug-an sa tinuod nga sila balikan sa pusher. Gipaubos na sa counseling ang pito ka estudyante ug nakauli na sila sa ilang mga panimalay apan ipadayon gihapon ang counseling nga molungtad og tulo ka buwan.
Giawhag ni Utlang ang ubang eskuylahan nga magpahigayon g’yud og random drug test aron mailhan kinsa sa ilang mga estudyante ang drug users.
Usa ka seminar ang ipahigayon sa COSAP sunod semana nga tambongan sa mga ginikanan aron matudloan sila sa kun unsaon pagdala sa ilang mga anak nga nakasuway na og gamit og illegal drugs.
Giawhag usab ni Utlang ang mga eskuylahan pagbutang g’yud og tarong nga security ug dunay mosuroy ug mag-random nga inspection sa mga studyante. (BANAT NEWS)
- Latest
