CEBU, Philippines - Napalgan ang usa ka fetus nga patay na ug gibana-bana nga anaa sa upat ka buwan ang pangidaron nga giputos og sinena sa sityo Mahayahay, Daanglungsod, dakbayan sa Toledo.
Si Jerry Bagapan, tanod sa maong barangay, ang nakapahibawo sa Toledo City Police Station human usa ka Donie Zabate Perez, 23, ang nakabantay nga may sinena nga gibilin daplin sa dalan nga adunay giputos hinungdan nga iyang giablihan.
Nakurat si Perez dihang maoy iyang nakita ang usa ka fetus ang giputos ug gibutang atbang sa usa ka dakung mall sa Toledo.
Gidala ang maong puya sa Toledo City Hospital ug nasuta nga padulong na kadugta ang lawas sa puya.
Ang kapolisan nihimo na og pakisusi aron pag-ila sa posibleng nibilin sa maong puya. (BANAT NEWS)