Sundalo nadakpan

CEBU, Philippines – Usa ka 33-anyos nga sakop sa Scout Ranger sa Philippine Army ang gipaslak sa Samboan Police human nga nasakpang nagdala og daghang ilegal nga armas, nga gituohang iyaha untang ipalusot luwan sa barko gikan sa Samboan padung sa Mindanao.

Ang dinakpan naila nga si Sergeant Charlito Cordivilla James, lumad nga taga Dumanjug, sakop sa 4th Scout Ranger Battalion nga nadestino sa Surigao Del Sur.

Si Police Officer 3 Janrey Roda sa Samboan Police nga nahinabi sa Banat News mitug-an nga paingon na unta nga mosakay sa barko si James alas- 6 sa hapon padung sa dakbayan sa Dapitan.

Apan nabantayan sa duha ka guwardiya nga mitingog ang metal detector,  nagpaila si James nga sakop sa  militar ug nagpakita sa iyang ID, apan usa sa mga guwardiya ang mihangyo nga ablihan ang bag aron maisyuhan og deposit slip. Nakurat ang guwardiya nga daghan kaayong armas ang sud sa bag. Dali nga mitawag sa coast guard ang mga guwardiya ug sa pagsusi sa maong mga armas mitawag na sila dayon og polis.

Nakuha sa sulod sa bag ni James ang lima ka KG9 submachine pistols, lima ka silencers, duha ka .45 pistols, pito ka .22 revolver ug mga magazines, pulos kini ginama sa Danao City.

Sumala pa nga nangangkon ang sundalo nga gipamalihogan ra siya sa iyang mga kauban sa pagpalit og armas human sa iyang leave. Gisubay karon sa kapulisan kun una pa kini nga higayon nga gihimo sa maong sundalo.

Samtang nadakpan sa mga sakop sa City Intelligence Branch sa Cebu City Police Office ang manag-amahang Asterio Nellas, 51, ug Nieljun Nellas, 22, diha sa Barangay Lorega -San Miguel ning dakbayan sa Sugbo human gireklamo sa mga silingan.

Nakuhaan og duha ka kalibre .45 pistola nga duna’y tag lima ka bala ang duha. Gisusi karon sa kapolisan kun dunay criminal records ang duha. – /EIM) (BANAT NEWS)