Mopatay nailogan sa armas

CEBU, Philippines - Swerte nga nailog sa usa ka lalaki ang armas sa wala mailhing tawo nga iyang gidudahan nga mosuway unta pagpatay kaniya hinungdan nga mikabad og dagan palayo kauban sa laing usa nga nagsakay og motorsiklo sa miaging hapon sa lungsod sa Moalboal.

Ang gisulayan og patay naila nga si Joselito Tapales, 37, molupyo sa sitio Bantayan 1, Basdiot sa maong lungsod.

Base sa imbestigasyon sa kapolisan, ang biktima mitawag sa ilang buhatan pasado alas 3 sa miaging hapon og mireklamo nga duna siya’y nasigpatan nga mga armadong tawo atbang sa ilang balay.

Daling miresponde ang kapolisan apan dihang naabot na sila sa maong lugar wala na ang mga armadong lalaki.

Apan nasuta nila gikan sa biktima nga ang duha ka lalaki sakay og motorsiklo ug nanaug atubangan sa iyang gate.

Nakita niya nga may dala nga armas ang usa sa duha ka lalaki maong miadto siya sa likod nga bahin sa iyang balay.

Apan ang usa sa duha ka lalaki mipadulong pud diay sa likod ug mition kaniya og kalibre .45 nga pistola.

Misukol siya sa maong lalaki ug nag-inilogay sila sa armas apan iyang nalupig ang maong lalaki hinungdan nga nakuha niya ang armas ug mikaratil og dagan sa kahadlok.

Sa pagdagan sa maong lalaki natagak ang drivers license apan gipugngan lang una sa Banat News ang pangan niini. Mikaratil sab og dagan ang laing lalaki nga nagsilbing lookout dihang nakita niya nga midagan ang iyang kauban.

Sa unahan mikuha sila sa lain pa’ng motor nga didto nag-parking ug mipasutoy og dagan.

Nabiyaan sa duha ang usa ka motor nga rehistrado sa usa ka lalaki nga taga Badian. Gi-turn-over sad sa biktima sa kapolisan ang pistola nga iyang naimbargo. (BANAT NEWS)