Traffic lights, CCTV prayoridad sa Toledo

CEBU, Philippines - Nagtinguha ang kapolisan sa dakbayan sa Toledo nga mabutangan og traffic lights ang mga eskina sa dakbayan aron maminusan ang trapiko sa pipila ka mga intersection point.

Kini ang gibutyag ni Police Chief Inspector Ricky Delilis, hepe sa Toledo City Police Station, dihang gipangutana kalabot sa pagsulbad sa trapiko sa dakbayan panahon sa rush hour.

Sagad maghuot ang mga traysikol ug mga trak de karga nga gikan sa dakbayan sa Sugbo, Balamban ug ang gikan sa pantalan nga bahin diin dagkung trak ang moagi sa dalan gikan pa sa probinsya sa Negros Occidental.

Tungod niini plano nga butangan og traffic lights ang dapit sa pantalan sa siyudad ug sa intersection sa barangay Sangi diin mag-abot ang mga sakyanan paingon ug gawas sa Balamban, Toledo ug dakbayan sa Sugbo.

Samtang sa laing bahin, human sa mga nahitabong pagpanulis ug lungkab sa pipila ka mga establesamento sa siyudad, prayoridad ni Delilis ang pagbutang og closed circuit television (CCTV) camera ilabi na sa mga financial establishments.

Kini aron makit-an ang mosulod gawas sa establesamento ug mailhan ang mga kriminal nga posibleng mohimo og dautang buhat.

Gitinguha sa hepe nga pabutangan og CCTV camera ang mga buhatan sa kagamhanan sa dakbayan human usab sa nahitabong paglungkab sa treasurer’s office diin kapin sa usa ka milyon ka pesos ang nahanaw. (BANAT NEWS)