CEBU, Philippines - Giawhag sa konseho sa dakbayan sa Sugbo ang Cebu City Women’s Commission sa pag-integrate sa Disaster Risk Reduction (DRR) ug Climate Change Adaptation (CCA) ug mitigation sa Gender and Development (GAD) program sa siyudad.
Giaprobahan niadtong Miyerkules sa konseho ang sugyot nga giduso ni Konsehal Alvin Dizon kabahin sa nahisgutang katuyoan.
Matud ni Dizon nga sa milabay’ng panahon nasuwayan na ang katakus sa kababayen-an sa pagpangulo sa ilang komunidad kabahin sa mga kalamboan.
Ang kababayen-an pwedeng ma-frontliners kabahin sa CCA ug sa kalihukan kabahin sa katalagman.
Matud pa nga kun ma-maximize ang katakus sa kababayen-an, makatabang kini sa tuyo nga maproteksiyonan ang kalikupan lakip na sa CCA ug DRR. (BANAT NEWS)