CEBU, Philippines – Mga health center sa kabarangayan sa dakbayan sa Sugbo butangan og diabetes care section aron sayon lang sa mga residente sa lugar ang magpa-eksamin kun duna ba kini diabetic ug kadtong dunay mga diabetic sila ma-monitor kanunay.
Si Konsehal Alvin Arcilla maoy misugyot nga kinahanglang butangan g’yud ang mga barangay og diabetes care section mao nga niadtong Miyerkules gihimoan og public hearing ang mao nga ordinansahon.
Matud ni Arcilla nga base sa statistics nagkadaghan ang mga tawo nga nakasinati karon og diabetes tungod sa pagpasagad og kaon, ilabi na kadtong mga tam-is ug ang kanunay nga pag-inom og mga softdrinks.
Gibana-bana nga kun dili makontrolar ang mao nga sakit moabot na og unom ka milyon ang mga tawo nga matakboyan og diabetes sa tuig 2030.
Si Dr. Albert Chu, usa ka endocrinologist ug ilado nga doktor nga nag-specialize og diabetic patients mibutyag nga ang Pilipinas maoy ika-15 nga nasud nga daghan og pasyente nga natakboyan og diabetes.
Matud ni Chu nga bisan ang pagkaon og daghang prutas ug juice makahatag gihapon og dili maayo nga epekto sa panglawas. Lakip sa sentomas sa diabetes mao ang pagpunay og pangihi, uhaw ug gutom.
Ang diabetes section sa kabarangayan butangan unya kini og mga ekipo kabahin sa pag-detect sa diabetes. – /RUB) (BANAT NEWS)