Avila: Pagsirado sa agianan may politika

CEBU, Philippines - Mipasangil si kanhi Kamagayan barangay kapitan Tony Avila nga dunay bulok politika ang pagpasirado sa kagamhanan sa dakbayan sa Sugbo sa gibuhat niya nga agianan sa ilang lugar.

Matud ni Avila nga niadtong tuig 1998 pa niya gihimo ang maong exit sa dili pa siya kapitan sa barangay ug ang maong exit nagamit sa mga residente dihang miulbo ang sunog niadtong tuig 2002 ug 2004.

Niulbo ang tensiyon kagahapon dihang giguba sa Prevention Restoration Order Beautification and Enhancement (PROBE) Team ang gihimo ni Avila.

Si Avila nipasangil nga sila ang apektado sa demolisyon ilabi na ang dili kaalyado sa mayor ang wala hatagi og pwesto ug ang taga laing lugar na hinuon ang gihatagan og pabor.   Si Cebu City Administrator, Dr. Lucille Mercado, nagkanayon nga dili maayo ang gibuhat ni Avila tungod kay gipalingkod o gihimong paon niini ang iyang amahan nga senior citizen sa nahisgutang exit aron dili matak-opan sa mga sakop sa PROBE Team.

Matud ni Mercado nga dunay agianan ang mga residente ug buot lang ni Avila nga anha moagi sa giingong exit nga gilungag sa pader sa Citi Center sa habig sa tindahan sa kapitan.

Iduso ni Mercado sa City Legal Office ang maong problema alang sa posibleng lakang nga buhaton kun padayong magmagahi si Avila sa iyang pagsupak sa pagtak-op sa pader nga gilungagan. (Brenda D. Batuto/GMR)(BANAT NEWS)