Naglakaw padulong sa merkado gidunggab

CEBU, Philippines - Naangol ang 34-anyos nga lalaki nga kalit lang gidunggab sa iyang gikasugat samtang padulong sa merkado publiko ala una pasado sa niaging kaadlawon sa Centro, dakbayan sa Mandaue.

Ang biktima mao si Eunil Modequillo, taga Felicitas Village, Looc, sa maong dakbayan ug ang nagdunggab mao si Roberto Suico, 29-anyos, taga sitio Ihawan, Mantuyong sa maong dakbayan.

Si PO1 Pregido Moneshira sa Presinto 1 sa Mandaue City Police Office (MCPO) miingon nga ang biktima nga nakalitan unang naigo sa iyang dughan ug gisundan pa sa makadaghang higayun.

Nakapanagang ang biktima sa iyang bukton nga maoy hinungdan sa daghang samad usab niining naangkon.

Ang pipila ka tawo sa maong dapit nga nakakita dali nga nakatawag sa kapolisan ug sila si PO1 Noel Alabaa ug PO1 Darius Conejos maoy nakatubag sa maong alarma ug dali usab nga misikop sa suspek.

Dali nga gidala sa Mandaue City Hospital ang biktima ug misugilon sa kapolisan nga dili niya kaaway ang suspek sanglit wala usab siya makaila niini.

Ang suspek nga gitanggong sa detention cell sa kapolisan daw wala pa sa iyang kaugalingon ug gituohan nga naggamit kini og ilegal nga drugas ug natripingan lang ang biktima. (BANAT NEWS)