Traysikol natumbahan og kahoy
CEBU, Philippines – Nakaangkon og samad sa iyang wala nga bukton ang usa ka drayber og traysikol human siya natumbahan sa naluka nga punoan sa kahoy tungod sa sige’ng pag-uwan didto sa Barangay Luray 2, dakbayan sa Toledo kaniadto’ng Lunes sa gabii.
Si Arnel Cristuta, 27, minyo, taga Sityo Kabulihan Uno, Barangay Ilihan, Toledo misaysay nga gikan siya sa Barangay Sangi ug paingon siya sa sentro nga bahin sa siyudad diha’ng pag-abot sa Luray 2 kalit lang nadungog niya ang kusog nga paka ug natumba ang punoan sa kahoy.
Naigo ang gimaneho niya nga traysikol ug suwerte na lang nga gamay ra’ng samad ang iyang nahiagoman.
Sa laing bahin, duha ka tawo ang naangol human mibangga ang usa ka motorsiklo ngadto sa usa ka traysikad didto sa Sityo Canjuntic, barangay Matab-ang, dakbayan sa Toledo.
Ang mga biktima giila nga sila si Kevin Bariatos, 20, ulitawo ug trabahante sa usa ka dakong tindahan sa Toledo apan taga Barangay Arpili, lungsod sa Balamban.
Si Kevin dali nga gidala sa Balamban District Hospital tungod sa grabe’ng kadaot sa lawas nga naangkon human nalagpot sa gimaneho’ng motorsiklo. Ang drayber sa traysikad nga si Melchor Rico, 42, ulitawo taga Barangay Matab-ang nakaangkon usab og samad sa iyang wala nga tiil. (BANAT NEWS)
- Latest
