Drayber og habal-habal mag-ID na
CEBU, Philippines – Mga drayber sa motorsiklo nga gitawag og “habal-habal” dili na tugotan nga makabiyahe sa dakbayan sa Toledo kun walay ID ug dili sila magsul-ob og uniporme sa ilang grupo. Plano ni Toledo City Police Chief Ricky Delilis nga ipatuman sa dakbayan sa Toledo nga may ID ug uniporme na g’yud ang mga habal-habal drayber sa siyudad.
Matud ni Delilis nga iya kining gitug-an ang iyang plano atol sa pakigpulong niya atubangan sa mga drayber sa traysikol ug habal-habal nga nag-operate sa dakbayan.
Tumong ni Delilis nga ma-organisar ang mga habal-habal drayber sanglit mao man kini ang gigamit nga transportasyon paingon sa bukiran nga bahin sa siyudad.
Ang ID ug uniporme adunay ibutang nga control number aron usab malikayan nga kini magdoble.
Diha nga nahinabi sa Banat Manobela ang pipila sa mga habal-habal drayber kabahin sa plano ni Delilis, sagad kanila niuyon sa maong lakang, apan adunay pipila nga misupak.
Apan ang pasahero nga si Mary Ann Santi nga taga Barangay Carmen nga sagad mosakay og habal-habal sa iyang pagpaingon sa trabaho ug pauli nakagusto sa plano ni Delilis.
Gawas sa mga habal-habal drayber, ipabalik na usab ni Delilis nga aduna nay mga uniporme ang mga traysikol drayber ug rehistrado nga body number sa ilang mga traysikol aron malikayan ang pagtadlas-tadlas sa mga traysikol nga makahatag og kasamok sa trapiko.
Pahugtan na usab sa traffic division sa dakbayan sa Toledo ang pagpatuman sa pagdili sa mga traysikad drayber nga magbahas-bahas sa national highway sanglit kalapasan kini sa balaod ingon man sa paglikay sa disgrasya. (BANAT NEWS)
- Latest
