CEBU, Philippines – Nagpakitabang sa Naga Police ang usa ka 19- anyos nga lalaki nga usa ka collector, human matud pa kini gitulis sa duha ka mga lalaki sa Barangay Balirong, dakbayan sa Naga niadtong Sabado sa hapon.
Ang biktima naila nga si Sintronio Edulan, taga dakbayan sa Sugbo ug nagtrabaho sa Libcan Company Incorporated nga nahimutang sa dakbayan sa Sugbo.
Matud pa sa saysay ni Edulan sa kapulisan sa Naga nga samtang kini nangolekta sa ilang mga kostumer sa maong barangay, kalit lang usa ka motorsiklo nga XRM nga wala’y plate number nga may sakay nga duha ka mga lalaki ang miduol kaniya.
Sumala pa gitionan siya sa duha og armas ug gikuha ang P40,000 nga koleksyon.
Si Police Officer Two Darwin Melodia, desk officer sa Naga Police nga nahinabi sa Banat News mitug-an nga nagpadayon pa ang ilang gihimo nga imbesti-gasyon sa maong hitabo.
Sumala pa ni Melodia nga usa sa ilang gisubay kung tinuod ba nga gitulis ang maong biktima sa maong lugar.
Gipasabot sab ni Melodia nga wala pa sukad nga dunay gitulis sa maong dapit. - /EIM) (BANAT NEWS)