CEBU, Philippines – Kawatan og wire nasikop sa duha ka mga guwardiya sa usa ka telecommunications company sa Barangay Sangat, San Fernando, Sabado sa buntag.
Ang dinakpan naila nga si Joseph Malasa, 40, taga Sitio Suba sa maong barangay, samtang ang nakasikop kaniya mao ang amahan ug anak nga guwardiya nga sila si Romeo ug Ramil Manlosa nga “Bantay Kable” sa telecom company nga nadestino sa maong lugar.
Matud pa ni Senior Police Officer Two Victor Cuyno, ang desk officer sa San Fernando Police nga nahinabi sa Banat News nga dunay nakasumbong sa duha nga dunay lalaki nga nanguha og cable wire daplin sa kalsada.
Sa pagresponde sa duha ilang naabtan ang suspek sa gitagoan niini nga hideout apan dali kini nga midagan hinungdan nga nahitabo ang ginukdanay hangtud nga kini nasikop.
Nakuha sa mga guwardiya gikan sa suspek ang 50 metros nga cable wire sulod sa sako nga duna’y kantidad nga P16, 601.080.
Sigun pa ni Cuyno nga taud-taod nang wala’y nanguha og cable wire sa maong lugar, apan gidemalas ang suspek kay nasakpan kini. -/EIM) (BANAT NEWS)