CEBU, Philippines – Muabot sa 162 ka mga pasahero nga sakay sa usa ka fastcraft nga paingon sa Tubigon, Bohol ug laing motorbanca ang naaberya human sa ilang mga biyahe kagahapon.
Matud pa ni Petty Officer Cerino Sambas sa Philippine Coast Guard sa Tubigon, Bohol nga alas 2:45 sa hapon napagngan og makina ang fastcratf nga Starcratf 2.
Ang maong fastcraft migikan sa Pier 1 sa Sugbo kagahapon sa hapon apan kalit kining napagngan og makina kay nag-overheat gibanabanang tulo ka nautical miles na lang sa dili pa modunggo sa Tubigon.
Matud pa ni Sambas nga ang pamunoan sa maong fastcraft ang dali ‘sab nga miresponde sa maong hitabo ug mipadala sa lain nilang sakyanan ug gibalhin ang mga pasahero.
Gitug-an ni Sambas nga anaa sa 122 ka pasahero ang naluwas; 112 mga hamtong ug pito ang mga bata ug mga masuso.
Samtang usa ‘sab ka motorbanca ang nasangad sa Mactan Channel atol sa pagbundak sa kusog nga ulan kagahapong adlawa.
Ang MB Clemer V nga gikan sa Getafe, Bohol ug paingon na unta sa Pier 1 sa dakbayan sa Sugbo nga duna’y sakay nga 40 ka mga pasahero ang napugos og hunong duol sa Mactan Channel human nga nag-zero visibility ang kadagatan.
Sa maong hitabo napalid ang maong motorbanca sa mabaw nga bahin ug nasangad, apan pasado alas-4 sa hapon paghunong sa ulan nakapadayon sila pagdunggo sa pantalan. Wala’y naangol sa maong duha ka insidente. -/EIM) (BANAT NEWS)