Kawatan og motor sa Basilica nadakpan

CEBU, Philippines -  Nasikop sa mga sakop sa Tourist Police ang usa ka lalaki nga gipasanginlan nga carnapper sa miaging gabii sa may parking area sa mga motorsiklo sa likod nga bahin sa Basilica Minore del Sto Niño de Cebu.

Ang nasikop naila nga si Joel Oftana, hingkod, taga Suba, dakbayan sa Sugbo.

Sa taho sa dyRC nasikop ang maong suspek human ang tigbantay sa mga motorsiklo nga giparking nakabantay nga misakay siya sa motor.

Apan ang bata nadunggan nga miingon nga “di man na imong motor” tungod kay nakatimaan man sa nawong sa tag-iya ang maong bata.

Daling gigukod sa mga tawo ang maong suspek ug naapsan kini hinungdan nga nakulatahan.

Apan daling miabot ang mga sakop sa Tourist Police nga miuwang sa mga tawo ug misikop sa suspetsado.

Nakuha gikan sa suspek ang unom ka master keys ug dihang gisulayan kini sa unom ka motor nga may pananghid sa mga tag-iya, nasuta nga miandar ang upat ka motor human nga gigamitan sa master key.

Lakip na nga miandar mao ang brand new nga Honda CVR 150 nga gipanag-iya sa hepe sa Tourist Police nga si Sr. Insp.Ardeolito      Cabagnot.

Wa’y kalibutan ang tag-iya nga gisulayan na diay og kawat ang iyang motor sanglit misimba man kini sa Basilica.

Andam mopasaka og kaso ang maong lalaki batok ni Oftana karong Lunes.

Pipila na ka mga motor ang gikatahong gikarnap sa maong lugar ug unang higayon nga nadakpan gyud ang suspetsado sa akto. (BANAT NEWS)