CEBU, Philippines - Negosyante og baboy gipusil patay ug gikuha pa g’yud ang P10 mil nga salapi niini sa wala pa mailhing tulisang nagmotor sa dakbayan sa Carcar.
Ang namatay naila nga si Conrado Regis, 54, molupyo sa Sitio Abuni, Barangay Valencia sa maong dakbayan.
Base sa pasiunang imbestigasyon sa kapolisan nga ang biktima gikan nagpalit og usa ka sako nga feeds kauban sa iyang kapuyo gikan sa Poblacion padulong sa ilang pinuy-anan.
Matud pa nga ang biktima ang nagdrayb sa iyang multicab uban sa iyang live-in partner apan sa pag-abot na nila sa balay mikanaog ang biktima sa multicab ug milingkod sa lingkoranan nga kahoy atubangan sa ilang balay ug ang iyang kapuyo misulod ‘sab sa ilang balay.
Paglabay sa 20-minutos nakabati ang iyang kapuyo og pito ka sunod-sunod nga buto apan wala lang ni niya panumbalinga.
Apan naalarma ang kapuyo sa biktima dihang ang ilang silingan misulti kaniya nga ang biktima gipusil sa wala mailhing tawo.
Daling gidala ang biktima sa Cebu Provincial Hospital sa Carcar City apan gideklarar nga dead on arrival.
Nasuta sa mirespondeng mga polis nga wala na sa bulsa sa biktima ang iyang P10 mil nga kwarta ug gituohan nga gidala sa mamumuno.
Padayon pa karon ang imbestigasyon sa kapolisan sa pag-ila sa maong killer ug sa pagdakop niini. (BANAT NEWS)