Expert: Karaang kahoy dili putlon

CEBU, Philippines - Gibutyag sa usa ka tree expert, Dr. Ernesto Militante, nga dili na himsog ang mga karaang punoan sa kahoy nga iyang nasusi niadtong Huwebes sa dakbayan sa Naga.

Apan rekomendasyon ni Militante mao nga wa’y bisan usa sa mga puno-an ang angay putlon kun di putlon lang ang mga sanga nga maoy nakapabug-at sa punoan ug nakaingon sa pagyung-yong niini sa daling panahon.

Apan ang Department of Environment and Natural Resources-7 wala’y lipod-lipod nga nibutyag nga wala nalakip sa ilang budget ang mga nagkadaiyang pamaagi sa pag-preserbar sa mga kahoy sa Naga hangtud sa Carcar.

Hinuon giawhag sa DENR-7 ang mga environmentalists mao’y mohimo og pamaagi sa pagpahigayun sa pagpamutol sa sanga ug ubang pamaagi.

Ang DENR andam mosuporta ug motabang sa himuon sa mga environmentalists.

Samtang ang pangulo sa Provincial Disaster Risk Reduction and Management Office, Baltazar Tribunalo, kinsa nitambong sa exit conference sa DENR-7, nitug-an nga andam sila motuman sa rekomendasyon kun kini makaayo sa kadaghanan.(Decemay P. Padilla/GMR)(BANAT NEWS)