CEBU, Philippines - Wala’y putos ug gibutang lang sa kasagbutan ang usa ka fetus nga napalgan sa Cabancalan 1, Bulacao, dakbayan sa Sugbo pasado alas 6 sa buntag kagahapong adlawa.
Matud pa ni SPO1 Rommel Bancog, imbestigador sa homicide section sa Cebu City Police Office, nga anaa na sa pito hangtud walo ka buwan ang maong puya.
Usa ka Roberto Ancero, 34, ulitawo , usa ka vendor nga nagpuyo sa maong lugar ang unang nakadiskubre sa maong fetus dihang nitubag kini sa sugo sa lawas.
Ang mga residente duol sa maong lugar ang wala usab nakamatikod sa milabay sa puya.
Si SPO1 Ruth Violango mipadayag og pagduda nga posible usab nga misanong lang sa sugo sa lawas ang inahan ug naatlan nga migawas ang puya.
“Kanang manganak gud ka mura ra ka og motubag og sugo sa lawas basin atol lang ni unya gibiyaan or gipakuha na ni sa una unya karon lang migawas,”sigun pa ni Violango.
Ang fetus gidala sa St. Francis Funeral Homes alang sa paghipos niini. (Jojo C. Ugdol/GMR)(BANAT NEWS)