E-Trike gilusad sa Tsuneishi ug Balamban

CEBU, Philippines - Human naila sa pagpanghimo og dagkong bulk carrier nga barko, ang Tsuneishi group of companies sa lungsod sa Balamban mopadagan na usab og mga electronic tricycles (E-Trike).

Gilusad kagahapon ang pasiunang napulo ka yunit sa E-Trike nga padaganon sa lungsod sa Balamban karong Domingo hangtud Martes isip testing period.

Matud ni Shinji Watadani, pangulo sa Tsuneishi C Values Corporation, nga himoon nila ang pagpalambo sa mga yunit base sa resulta sa testing period. Napulo ka drayber sa traysikol ang gipili sa lokal nga kagamhanan kinsa hatagan og tag P150 matag usa sulod sa tulo ka adlaw samtang ila na usab ang tanan kita.

Si Mayor Ace Stefan Binghay nihangop sa proyekto sa kompaniya aron mahimong labing una sa nasud nga mopadagan sa E-Trike.

Matud ni Binghay nga ilang gitabangan ang kompaniya sa paghikay sa mga papeles nga gikinahanglan nga makapadayun sa pagpanghimo sa maong matang sa sakyanan nga de kuryente.

Si Watadani nibutyag nga ang matag yunit nga ilang gigamit sa testing period mobalor og US$3,000 nga ginama sa China.

Nanghinaut si Watadani nga suportahan sa publiko ang proyekto ug iyang gipasalig nga mohimo sila og mas de kalidad pa nga yunit ug sa mas ubos nga presyo. Ang E-Trike masakyan og unom ka pasahero ug ang battery nga kargahan sulod sa napulo ka oras makadagan na hangtud sa 60 kilometros. (BANAT NEWS)