CEBU, Philippines - Patay na nga nadangat sa Vicente Sotto Memorial Medical Center ang 41-anyos nga lalaki human nabanggaan sa usa ka Isuzu Elf alas 7:52 niadtong Miyerkules sa gabii sa dalan F. Cabahug, Kasambagan, dakbayan sa Sugbo.
Ang biktima naila nga si Junito Entizo, minyo nga taga Pier 3, Tinago samtang ang drayber sa Isuzu Elf naila nga si Apolinario Jayme Jr., 34, ulitawo nga taga Sitio Uragay, Corte, Carmen.
Sa imbestigasyon sa traffic division nga gipangulohan ni SPO1 Porferio Lim nasayran nga paingon unta motabok sa karsada ang biktima apan wala niini nabantayan ang nagdagan nga truck.
Dali pa unta nga gidala sa tambalanan ang biktima apan nakabsan gyud kini sa iyang kinabuhi gumikan sa seryosong bun-og sa lawas nga iyang naangkon samtang boluntaryo sab nga misurender ang drayber sa kapolisan ug gitanggong ang truck sa buhatan sa City Traffic Operations Management (CITOM). (BANAT NEWS)