CEBU, Philippines - Gidakop sa kapolisan sa checkpoint ang duha ka tawo nga nagsakay og motorsiklo nga wala magsul-ob og helmet apan nasakmitan hinuon og shabu ug drug paraphernalia.
Kini nahitabo alas 12 pasado sa tungang gabii kagahapon sa dalan M. Logarta, Subangdaku, dakbayan sa Mandaue.
Si SPO1 Michael Limalima sa Presinto 2 sa Mandaue City Police Office (MCPO) miila sa mga nadakpan nga sila si Marlon Valiente, 35 ug Charlemagne Alarde Jr, 35, pulos ulitawo nga taga Curva, Medellin.
Ang checkpoint gipangulohan sa deputy chief sa presinto nga si Inspector Ricky Calong ug maoy nagpahunong sa motorsiklo nga gimaneho ni Valiente samtang angkas si Alarde.
Sa pagrikisa mao’y nadiskubrehan nga si Valiente ang nagdala og tin foil ug si Alarde nagdala og usa ka gamay nga paketeng shabu ug usa ka tin foil hinungdan sa ilang pagkatanggong ug pasakaan og tukmang kaso. (BANAT NEWS)