CEBU, Philippines - Nakaihi nga nagyaka samtang gipusasan sa hawanan sa Lapu-Lapu City Police Office ug nagsige og kanta ang usa ka suspetsadong carnapper nga nasikop niadtong Miyerkules sa udto.
Napatiran pa gyud sa polis ang suspek nga si Antero Sagarino, 44, nga taga Sambag, Pajac sa maong dakbayan dihang gisuwayan niya og kab-ot ang kutsilyo nga gibutang sa lamesa sa Theft and Robbery Section sa LCPO.
Usa ka Narciso Linao, 52, nga nagpa-blotter sa TRS mibutyag nga iyang nasakpan si Sagarino nga niguyod sa iyahang itom nga Suzuki nga motorsiklo sulod sa ilang balay sa Bagumbayan II, Marigondon.
Gibuhian dayon ni Sagarino ang motorsiklo ug nidagan palayo apan naalerto ang mga silingan ni Linao hinungdan nga kini gigukod.
Sa pagpakighinabi sa suspek sa mga tigbalita, si Sagarino miangkon sa alegasyon ug gani 18-anyos pa siya nagsugod sa pagpangawat og motorsiklo.
Matud pa niya nga aduna siya’y contact person nga motabang kaniya og swap sa mga gikawat nga motorsiklo sa mga surplus motor shops.
Matud ni Senior Inspector Zenaido Pastorfide, hepe sa TRS, nga ang suspek naimpluwensyahan sa drugas ug mangawat siya og motorsiklo bugti sa ginadiling drugas.
Si Pastorfide nagkanayon nga pasakaan og carnapping ang suspetsado human sa insidente. (BANAT NEWS)