CEBU, Philippines - Patay na nga naabot sa tambalanan ang usa ka 48-anyos nga lalaki human kini gidunggab sa iya ra ‘sab nga silingan. Ang biktima nga si Edmundo Alcain, minyo nakaangkon og dinunggaban sa iyang liog ug tiyan diha nga gidunggab siya didto sa Barangay Lamacan, Argao, niadtong nakalabay nga gabii.
Si PO2 Paulino Sanchez sa Argao Police Station miingon nga ang midunggab sa biktima nailhan nga si Joevan Camarillo, 31, minyo ug nagpuyo sa Sitio Maling-lingon sa maong barangay.
Nagtuo si PO2 Sanchez nga na-tripingan lang sa suspek ang biktima ug kini giluba. Sa wala pa mahitabo ang pagpanunggab, ang biktima kauban sa iyang mga barkada nag-inom sa mao nga dapit.
Kalit lang mitungha ang suspek ug gihansakan diritso ang biktima gamit ang usa ka punyal.
Si Alcain gidala unta dayon sa Isidro Kintanar District Hospital apan kini nakabsan gayud sa iyang kinabuhi. Ang kapolisan mihimo dayon og follow-up operation ug nadakpan nila ang suspetsado didto sa iyang panimalay. Matud pa nga gipasakaan na og kaso’ng murder si Camarillo nga gitanggong na sa Argao Police detention cell. (BANAT NEWS)