CEBU, Philippines - Wala mananghid sa Department of Public Works and Highways (DPWH) ang tigpasiugda sa gihimong experiment sa road sharing sa mga nag-unang dalan sa uptown area sa dakbayan sa Sugbo niadtong Domingo sa hapon hangtud sa gabii.
Matud ni DPWH-7 Director Ador Canlas nga nagkinahanglan og proper coordination ug taas-taas nga panahon sa pagpangandam ang kalihukan sama sa experimental road sharing.
Giingong daghan ang nangatanggong ug nahasol tungod sa grabeng kahuot sa dagan sa trapiko sugod sa alas 4 sa hapon hangtud sa gabii.
Matud ni Canlas nga wala’y ni-courtesy call sa DPWH-7 nga mga tigpasiugda sa kalihukan.
Ang mga dalan nga gigamit sa road sharing iya sa nasudnong kagamhanan ug gikinahanglan ang permiso o clearance gikan sa DPWH-7 una pa ipatuman ang mga kalihukan.
Hinuon wala na gipadaku pa sa direktor ang wala pagpangayo og permiso sa ilang buhatan.
Gipadayag lang ni Canlas ngadto sa mga nagpasiugda sama sa Movement for Livable Cebu ug sa kagamhanan sa dakbayan sa Sugbo nga una mopahigayun og susamang kalihukan gikinahanglan ang paghimo una og mekanismo ug sistema unsaon ang pagpahigayun.
Gikinahanglan usab nga mapahibawo ang mga stakeholders aron wa’y daghang mga tawo ug motorista ang matanggong tungod sa pagsirado sa katunga sa dalan. (BANAT NEWS)