CEBU, Philippines – Ang anggulo nga personal na lang ang gilantaw ug gitutukan sa imbestigasyon sa kapolisan sa dakbayan sa Sugbo may labot sa pag-ambush sa negosyanteng si Jonathan Go sa Happy Valley Subdivision, Guadalupe.
Matud ni Senior Supt. Noli Romana, director sa Cebu City Police Office (CCPO), nga nakuha na nila ang mga impormasyon nga makadugtong sa mga nauna na nga impormasyon nga ilang nakuha aron sa posibleng pagsulbad sa kaso. Gipasabot ni Romana nga duna na sila’y inisyal nga nakita nga posibleng magdugtong tali sa biktima ug sa gihulagway nga mastermind sa krimen.
Wala hinoon gibutyag ni Romana ang pangan sa mastermind samtang may artist sketch na ang kapolisan sa panagway sa usa sa duha ka mga gunmen nga may gitas-on nga 5’4” hangtud 5’5”, puti-on ang pamanit ug kasamtangan lang ang gidak-on.
Gipasalig ni Romana nga sa dili madugay ila ra gyud masulbad ang maong kaso ug mahatag ang hustisya sa pamilya. -/GMR) (BANAT NEWS)