CEBU, Philippines - Gisugdan na ang sabot-sabot alang sa sensitibo apan usa sa labing importanteng bahin sa peace process sa Mindanao, ang pagdis-arma sa mga rebeldeng Moro Islamic Liberation Front (MILF).
Ang government negotiators ug MILF leaders atoa karon sa Kuala Lumpur, Malaysia aron tukion ang unang batch sa pagdis-arma nga gipaabot nga himuon sa dili pa matapos ning tuiga, matud pa sa report sa Interaksyon. Tulo ka mga foreign experts gikan sa Brunei, Turkey ug Norway ang makig-uban sa mga independenteng sector ug local experts nga pilion aron motan-aw sa proseso.
"Decommissioning is a delicate and difficult component of any peace settlement. It must be done effectively and sensitively," sumala pa sa pangulo sa Philippine government negotiator nga si Miriam Coronel-Ferrer sa iyang pamahayag.
Si chief rebel negotiator Mohagher Iqbal dunay 75 ka nagkalain-laing armas apil niini mga high-powered rifles ang gihipos karon sa bodega isip kabahin sa "normalization" process.
Matud pa ni Iqbal, kinahanglan sila nga mosakripisyo alang sa katumanan sa damgo sa Bangsamoro. Ang Bangsamoro sa Mindanao maghatag og kahigayonan sa Muslim minority nga maoy modumala sa ilang kaugalingon base sa kasabotang ilang gipirmahan uban ni Presidente Benigno Aquino niadtong bulan sa Marso.(Gikan sa Wires/EIM)
3 mil na ang namatay sa Ebola
Miabot na og 3 mil ka tawo ang kompirmadong namatay sa sakit nga Ebola Virus, nga gihulagway nga kinadaghanang napatay gikan sa pag-outbreak sa Ebola epidemic sa West Africa.
Sumala pa sa report sa World Health Organization, gawas sa 3 mil nga nangamatay, duna pay kapin sa 6,500 ka tawo ang natakboyan niini nga anaa karon sa nagkalain-laing mga tambalanan sa lima ka mga managsilingang nasud sa West Africa. Sa labing uwahing talaan sa WHO, 6,574 ka tawo ang natakboyan na niini gikan sa Liberia, Guinea, Senegal, Sierra Leone ug Nigeria.
Usa sa dakong hagit sa WHO ug sa mga health experts pagkontrolar sa pagkatap sa maong sakit mao ang nagpabiling pagsalig sa mga tawo sa maong mga nasud sa ilang “pagtuo-tuo” ug tradisyonal nga pamaagi sa pagpanambal.
Daghang mga pasyente nga natakboyan sa maong sakit nga giatiman sa mga tambalanan ang pugsanong gipangkuha sa ilang mga paryente ug gidala sa ilang mga lugar ug gipatambalan sa ilang mga “tambalan” hinungdan nga ang tanang nakauban sa pasyente natakdan sa maong sakit. (BANAT NEWS)