Isda nga Ludong bawal kuhaon

CEBU, Philippines - Gideklarar sa Bureau of Fisheries and Aquatic Resources (BFAR) ang 45-adlaw nga ban sa pagkuha og isda nga “ludong”, mao kini ang kinamahalang matang sa isda sa Pilipinas nga gikatahong daghan sa Cagayan Valley.

Ang Ludong naila usab nga “Isda sa Presidente” o Pacific Salmon apan gitawag usab og “banak” kini paliton og P5,000 kada kilo.

Sumala pa sa report sa Interaksyon, si Arsenio Bañares, hepe sa BFAR  regulatory and quarantine sa maong rehiyon, gipakatap na ang fishery law enforcement teams sa mga dapit nga diin makuha ang maong isda.

Gawas sa BFAR, kauban nila sa pagbantay ang mga sakop sa Philippine Coast Guard, police, local government units ug mga volunteers gikan sa Sagip Ludong Movement.  Ang ban gibase sa BFAR administrative circular nga nagdeklarar sa pag-ban sa pagkuha sa maong isda gikan sa Oktubre 1 hangtud sa Nobiyembre 15 kada tuig. Kining maong mga adlawa sumala pa sa BFAR maoy pagsugod og tapok sa mga babayeng Ludong gikan sa mga suba ug kasapaan sa mga bukid sa Isabela, Quirino ug Nueva Vizcaya padung sa dagat aron mangitlog.

Naandan na sa mga mananagat nga atangan ang agianan sa maong mga isda aron sila makuha hinungdan nga naapektahan ang pagdaghan sa mga mangitlog niini sa dagat ug nameligro na hinuon nga mahurot ang suplay.

Ang masakpang milapas niini, prisuhon og unom ka bulan (minimum)  ngadto sa walo ka tuig (maximum) ug pamultahon pa g’yud gikan sa P6,000 ngadto na sa P80,000. (BANAT NEWS)