CEBU, Philippines - Nasikop sa mga sakop sa City Intelligence Branch ang usa ka lalaki nga gitudlo nga nagbaligya og nubain sa buy-bust operation nga gihimo sa barangay Kamagayan, dakbayan sa Sugbo.
Ang nasikop naila nga si Gino Villegas, 18, ug ang usa ka 17-anyos nga dalagita nga molupyo sa nahisgutang lugar.
Ang mga sakop sa CIB nga gipangulohan ni SPO1 Raymond Supatan ang nakadakop sa duha human napalitan sila og P200 nga kantidad sa nubain.
Nakuhaan pa gyud sila og 136 ka mga ampoule sa nubain atol sa operasyon.
Nagtuo ang hepe sa CIB nga si Supt. Romeo Santander nga dunay financier ang maong mga batan-on apan nagdumili ang duha sa pagbutyag sa ilang amo.
Matud ni Santander nga pipila na ka higayun nga gihimo nila ang pagpangronda sa Kamagayan apan nagpabilin lang gihapon ang paghitak sa ilegal nga drugas sa maong lugar.
Sagad sa gibaligya sa maong lugar mao ang nubain ug shabu nga matud pa ni Santander kinahanglan og subsob nga operasyon. (BANAT NEWS)