CEBU, Philippines - Usa ka pulis nga nadestino sa usa ka siyudad sa habagatang bahin sa Sugbo ang gikatahong gireklamo diha sa Women’s and Children Protection Desk sa Police Regional Office -7, human matud pa nakapaburos og duha ka babaye bisan kini usa ka minyo.
Kini ang nakuha nga impormsyon sa Banat News gikan sa usa ka opisyal sa kapulisan nga mitug-an sa maong hitabo apan nagdumili sa pagpahingalan.
Matud pa sa maong pulis opisyal nga iyang gikuyogan sa PRO 7 ang 23-anyos nga dalaga human kini miduol kaniya kay nangita na sa maong pulis tungod kay wala na mohatag og pinansiyal nga tabang uban sa ilang dos anyos nga anak.
Gikatahong nagtrabaho sa usa ka mall sa dakbayan sa Sugbo ang maong babaye samtang ang gireklamong polis nga nagranggo og Police Officer One iyahang naila-ila niadtong nagpaubos pa kini og Field Training Program sa Cebu City.
Matud pa nga gipatuo siya niini nga ulitawo hinungdan nga nagkarelasyon sila ug nagkaanak. Apan diha sa Women’s Desk sa PRO 7, sumala pa nga diha niini nahibaw-an dihang gitug-anan sa polis nga duna say susamang mireklamo batok gihapon sa maong pulis nga gipamabdusan ‘sab.
“Pwerteng hilak sa babaye intawon kay malalim nimo na nga naa pud diay gipaburosan si PO1___ unya gipahibalo pa g’yud siya nga dakung minyo diay pud ni siya,” sigun pa sa impormante sa Banat News.
Apan sa pakighinabi sa Banat News ni SPO1 Rowena Parilla sa Women’s and Children Protection Desk sa PRO 7, kini mitug-an nga wala silay nadawat nga impormasyon ma’y labot na sa maong reklamo.
Apan gipasabot niya nga posibleng lain nila nga imbestigador ang mihawid sa maong kaso o ba kaha gipadala sa mother unit sa maong pulis ang reklamo.
Gibutyag ‘sab ni Parilla nga kung tinuod man ang maong hitabo, posibling matangtang sa serbisyo ang maong pulis. (Jojo C. Ugdol/EIM)(BANAT NEWS)