CEBU, Philippines - Nasakmit ang pinaketeng shabu ug armas uban sa pagkasikop sa unom ka tawo sa buy-bust operation sa managlahing oras ug dapit sa dakbayan sa Mandaue.
Si Police Senior Inspector Rommel Luga, hepe sa Presinto 6 sa Mandaue City Police Office (MCPO), ang nangulo sa operasyon sa barangay Casili alas 6 pasado diin nadakpan si Bobby Mendaros, 35, nga nagpuyo sa maong dapit.
Human nadakpi si Mendaros, namatikdan sa kapolisan ang pagpanagan sa duha ka tawo nga ilang gituohang nagsuyop og shabu sa sulod sa panimalay hinungdan nga dali nilang gigukod ug nadakpan.
Ang duha nailhan nga sila si Joel Mendaros, 28, ug Carlo Tudtud, 27, mga ig-agaw sa unang nadakpan nga pulos nagpuyo sa maong dapit.
Sa ilang pagrekisa kang Bobby maoy ilang nakuha ang dugang pa’ng pito ka paketeng shabu, P200 nga marked money, P230 nga kuwarta nga gituohang halin sa gibaligyang shabu ug ang laing duha nga sila si Joel ug Carlo ang nakuhaan usab og tagsa ka paketeng shabu ug mga drug paraphernalia.
Dugang nga nadakpan mao sila si Mardonio Matbagon, alyas Ting, 19; Darwin Tarona alyas Oling, 34, ug usa ka babaye nga si Maria Victoria Ungal alyas Lara, 33, nga pulos taga barangay Looc.
Si SPO2 Juan Calamba sa Presinto 5 sa MCPO miingon nga sila si PO3 Joel Osabel, PO3 Niño Gorneo ug PO1 Michael Mata maoy nakadakop dihang gihimo ang buy-bust operation batok kang Matbagon.
Nakuha gikan kang Matbagon ang 21 ka paketeng shabu ug usa ka 9mm nga armas nga adunay unom ka bala samtang si Tarona ang nakuhaan usab og upat ka paketeng shabu ug mga drug paraphernalia. (BANAT NEWS)