Parking attendant napunggit sa motor

CEBU, Philippines - Laing sakop na usab sa Cebu City Traffic Operations and Management (CITOM) ang nabanggaan og motorsiklo ug gibiyaan lang sa may eskina sa dalan D. Jakosalem ug Osmeña Boulevard niadtong Miyerkules sa hapon. Ang biktima sa hit and run naila nga si Maria Edwina Purgatorio, 52, taga Villa Concepcion, Kinasang-an, Pardo ug parking attendant sa maong lugar.

Sa imbestigasyon nga gihimo ni SPO1 Porferio Lim sa traffic division nasayran nga samtang mitabok ang biktima sa karsada, wala kini kabantay sa motorsiklo nga gimaneho sa usa ka lalaki kinsa daling mibulhot paingon sa Carbon area.

Ang biktima dali nga gidala sa Cebu City Medical Center (CCMC).

Si Joy Tumulak, operations chief sa CITOM, nga nahinabi sa Banat News mitug-an nga hangtud karon wala pa nila nailhi ang drayber sa motorsiklo.

Ila pa nga subayon kung naa ba’y close circuit television (CCTV) camera ang maong lugar aron pag- ila sa drayber ug  sa plate number sa motorsiklo.

Hinuon gibutyag ni Tumulak nga luwas na sa delikadong kahimtang si Purgatorio.  (BANAT NEWS)