CEBU, Philippines - Gipasaka na kagahapon sa korte ang kasong ilegal nga pagbaligya og shabu batok sa kanhi konsehal sa barangay Panugnawan, Medellin.
Si Buenaventura “Verino” Diaz, 37, kinsa nadakpan niadtong Domingo, mi-waived sa iyang katungod pagtubag sa pasangil atol sa inquest proceeding sa piskaliya niadtong Martes.
Matud ni PO3 Ryan Castro sa Medellin Police Station nga ang maong kaso wala’y piyansa.
Dugang kasong gipasaka mao ang pagbaton ni Diaz og lugar nga suyupanan ug ilegal nga paghupot og armas.
Laing mga akusado mao sila si Roberto “Ruby” Opon, 32; Ernani Sinoy, 35; Rafil Ypil, 45; Noel Gullin, 19; Rodeo Cutab, 30; Randy Alarde, 37; Randy Vargas, 39; Dustin Bedrijo, 35; Mark Anthony Rondina, 32; ug Ian Pepito, 26.
Si Opon nag-atubang og kasong pagpamaligya og ginadiling drugas, ilegal nga paghupot og ginadiling drugas ug ilegal nga paghupot og armas.
Samtang sila si Sinoy, Ypil, Gullin, Cutab, Alarde, Vargas, Bedrijo, Rondina ug Pepito nag-atubang og kasong pagbisita sa drug den kinsa ang piskaliya mirekomendar og P200 mil nga piyansa sa ilang kagawasan. Matud ni Castro nga sila si Alarde ug Gullin pa ang nakapiyansa. (BANAT NEWS)