CEBU, Philippines - Nasikop sa kapulisan sa lungsod sa Consolacion ang tulo ka gipasanginlang tulisan human nila gitulis ang usa ka habalhabal drayber sa Cansaga National Highway, Barangay Cansaga.
Ang mga nasikop naila nga sila si Vicente Ortega, 21, taga Bag-ong Dan, Liloan nga nakuhaan og usa ka .38 revolver nga dunay tulo ka bala, ug usa ka granada, Rex Cabahug, 22, taga Yati Liloan, nakuhaan og duha ka pakete sa gituohang shabu ug Archie Eresido, 27, taga Tugbungan, Consolacion nga nakuhaan ‘sab og duha ka paketeng shabu.
Ang biktima sa tulo naila nga si Antonio Mancao Pepito, 37, nga taga Cansaga, Consolacion.
Matud pa ni Senior Police Officer One Francisco Perez sa Consolacion Police nga nahinabi sa Banat News sakay sa motorsiklo si Pepito dihang gipara kini sa tulo ka mga suspek ug gitulis.
Apan gidemalas ang tulo tungod kay nakapangayo og tabang ang biktima sa nag-roving nga mga polis nga gipangulohan sa hepe sa maong lungsod Senior Inspector Francis Oriol.
Gikatahong wala dayon mitahan ang mga suspek kay nanibat apan naabtan gihapon ug nangadakpan.
Sumala pa nga dunay nangabot-abot nga uban pang biktima sa tulo nga positibong miila nga maoy mitulis kanila.
Patongpatong karon nga kaso ang atubangon sa mga dinakpan nga gikatakdang pasakaan og tukmang kaso karong adlawa. (BANAT NEWS)