Papua New Guinean nanumbag
CEBU, Philippines – Lain na sab nga Papua New Guinean ang gipaslak sa presinto sa kapolisan human nahubog ug nanumbag sa usa ka imnanan Mango Square, Cebu City.
Ang maong langyaw naila nga si Garry Nigel Chrich, 21, kasamtangang nagpuyo sa TPI Aviation Road, Pajac, Lapu-Lapu City apan lumad nga taga Port Moresby, Papua New Guinea.
Sa imbestigasyon sa Fuente Police nasayran nga mireklamo ug nangayo og pakitabang sa kapolisan ang usa ka Leonardo Matañosa, stockman sa imnanan ug taga Tres de Abril, Labangon human gisumbag ang nawong sa maong langyaw.
Gikan nag-inom sa usa ka VIP room ang maong langyaw kauban ang mga barkada niini dihang kalit lang kini nigawas nga hubog na ug nanumbag.
Daling miresponde ang Mobile Patrol Group (MPG) sa maong lugar.
Apan ang usa ka polis nga si PO2 Florencio Cabanlit ang nakatilaw sab og sukmag igo sa iyang liog dihang iya na unta pusasan ang langyaw.
Unang gidala ang langyaw sa Cebu City Medical Center ug gipaubos sa liquor test diin positibo ang resulta una pa gibalhug sa Fuente Police detention cell.
Kasong paghubog-hubog, physical injury ug direct assault ang ipasaka karong adlawa batok sa langyaw. -/GMR) (BANAT NEWS)
- Latest
