Mga plate numbers wala kuhaa

CEBU, Philippines - Daghan pa kaayo nga mga motorista dinhi sa Sugbo ug ubang bahin sa Central Visayas kang kansang mga sakyanan wala pay plate numbers ang napakyas pag-adto sa mga buhatan sa Land Transportation Office (LTO) aron sa pagkuha sa ilang mga plaka.

Kini maoy gibutyag ni LTO-7 Assistant Regional Director Alita Pulga kinsa padayon nga miawhag sa mga motorista pagkuha na sa ilang mga bag-ong plate numbers kay hapit na sugdi ang estrikto nga kampanya nga mga sakyanan nga walay plaka dakpon na g’yud. Kapin sa 26 mil ka plate numbers alang sa mga motorsiklo ang nangabot na alang sa Central Visayas ug dul-an sa 20 mil usab ka plate numbers nga alang sa mga four-wheeled vehicles.

Matud ni Pulga nga base sa ilang rekord hilabihan pa kadaghan ang mga vehicle plate numbers nga wala pa makuha ug anaa kini sa lainlaing LTO Branches.

Ang bag-o nga plate numbers alang sa mga motorsiklo nagdala kini og duha ka letra ug lima ka numero, dili sama sa naandan nga ang plaka sa motor duha lang ka letra ug upat ka numero. Sa mga four-wheeled vehicles ang bag-ong mga plate numbers tulo ka letra ug upat ka numero dili sama sa karaang plaka nga tulo ka letra ug tulo usab ka numero.

Ang pagdugang og mga numero sa plate numbers gituyo aron nga ma-accommodate ang nagkadaghan na nga mga sakyanan nga narehestro sa LTO gikan sa lainlaing dapit sa    nasud.

Kapin na sa pito ka milyon ka sakyanan ang narehestro sa tibuok nasud ug ang kapin sa 652 mil niini, subra sa tunga sa milyon, dia marehestro sa Central Visayas ug kadaghanan sa Sugbo magdagan.  (BANAT NEWS)