CEBU, Philippines - Nangayo og tabang ang konseho sa barangay Labangon, dakbayan sa Sugbo kabahin sa ilang problema sa kahugaw sa dalan Abellana sa sitio Bugnay II tungod sa operasyon sa usa ka junk shop.
Ang junk shop maoy gipasanginlan sa mga residente nga hinungdan sa kahugaw sa palibot, pagbara sa kanal tungod sa mga hugaw nga wala itarong og labay ug giingong mao usab kini hinungdan sa pagsaka sa insidente sa kawat ug sa pagtumaw sa mga rugby boys. Ang mga residente sa sitio Riverside-Pablo Abella road ang mipadangat og suwat reklamo kang Kapitan Victor Buendia.
Ang konseho sa barangay nipalabang og resolusyon sa pagpangayo og panabang sa kagamhanan sa siyudad sa maong problema.
Nasuta nga ang nahisgutang junk shop wala’y business permit.
Ang Cebu City Environment and Natural Resources Office (CENRO), Cebu Environmental Sanitation and Enforcement Team (CESET), Prevention Restoration Order Beautification and Enhancement (PROBE) ug ang City Health Department maoy gisangonan sa pagpahigayon og imbestigasyon.
Ang report sa nahisgutang mga ahensiya ang basehan sa City Attorney’s Office alang sa tukmang aksiyon. (BANAT NEWS)