Bag-ong power plant sa Toledo gisubhan

CEBU, Philippines - Gisubhan sa Global Business Power Corporation (GBPC) pinaagi sa Toledo Power Corporation (TPC) ang bag-ong 82 megawatts nga coal-fired power plant sa barangay Daanglungsod, dakbayan sa Toledo kagahapon.

Ang maong power plant gamiton sa pagsuplay sa kuryente sa Carmen Copper Corporation diin 55MW ang gamiton niini samtang ang 17MW maoy dugang suplay sa kuryente alang sa Cebu Electric Cooperative (CEBECO) III.

Nagkantidad og P10.2 bilyones ang maong expansion project sa GBPC.

Matud ni Francisco Sebastian, chairman sa GBPC, nga ang bag-ong planta maoy ilang pasalig alang sa pagpalambo sa Visayas ingon man tubag sa panawagan sa gobiyerno tungod sa gituohan nga krisis sa suplay sa kuryente sa tuig 2015. Ang planta maoy dugang sa padayon nga nag-operate nga 60MW coal-fired ug 40MW nga diesel-fired plant sa TPC.

Nitambong usab sa switch-on ceremony si Department of Energy Undersecretary Raul Aguilos, Bise Gob. Agnes Magpale, DOE-7 Regional Director Antonio Labios,  City Mayor John Henry “Sonny” Osmeña ug mga konsehal.

Gihangop ni Osmeña ang maong proyekto isip dugang kalamboan sa siyudad.

Samtang gihimug-atan usab ni Jaime Azurin, executive vice president sa GBPC, nga magamit ug makatabang ang dugang suplay agi’g tubag sa mas taas nga panginahanglan sa kuryente sa summer season ingon man sa umaabot nga Asia Pacific Economic Cooperation (APEC) Summit nga ipahigayun sa nasud. (Raymond Abarcas/GMR)(BANAT NEWS)