Solo parents iparehistro

CEBU, Philippines - Giawhag ni Konsehal Gerardo Carillo ang kabarangayan sa dakbayan sa Sugbo nga mopahigayon na og pangrehistro sa mga solo parents diha sa ilang lugar sugod karon hangtud katapusan sa Oktubre niining tuiga.

Tumong sa pagpangrehistro aron mahibaw-an sa kagamhanan sa siyudad ang gidaghanon sa “solo parents”.

Matud ni Carillo nga ang Department of Social Welfare and Services (DSWS) mao’y mo-validate sa mga nagparehistro kun kwalipikado ba kini.

Ang dakbayan sa Sugbo dunay duha ka ordinansa kabahin sa solo parents. Usa niini ang “solo parent package assistance” nga magpautang og puhunan nga magamit sa livelihood program o panginabuhian.

Ang mga solo parents gitugutang maka-loan gikan sa P5 mil ngadto sa P10 mil alang sa ilang livelihood.

Tumong usab nga marehistro ang ilang mga anak aron mahatagan og hinabang sa gobiyerno ug maapil sa educational assistance.

Makapahimulos usab ang solo parent sa “five-day leave” subay sa nalatid sa balaud.

Ang ikaduhang ordinansa mao ang “financial assistance” diin ang solo parent hatagan og P5,000 nga ayuda matag tuig.

Ang makabenepisyo mao lang ang rehistradong botante sa dakbayan sa Sugbo ug nakabotar na sulod sa tulo ka eleksiyon ug ang kita nga P60 mil paubos sa usa ka tuig.

Ang mga kwalipikadong solo parents sa sunod tuig pa kini mahatagan sa nahisgutang benepisyo sa siyudad.  (BANAT NEWS)