CEBU, Philippines - Gisikop sa San Nicolas Police ang usa ka 28-anyos nga lalaki nga giilang usa ka level 3 drug pusher sa sitio Mahayahay, Calamba, Cebu City ug gilakip sa pagsikop ang iyang ugangan nga babaye alas 11 sa buntag niadtong Miyerkules.
Ang mga nasikop naila nga sila si Janard Beldad ug iyang ugangan nga si Edna Suico, 49.
Si Senior Inspector Chuck Barandog, hepe sa San Nicolas Police Station ang nangulo sa operasyon dala ang search warrant.
Apan nasayran nga may pending warrant of arrest si Beldad sa kaso paghupot og drug paraphernalia.
Matud ni Barandog nga moabot halos usa ka buwan ang ilang gihimo nga pag-surveillance ni Beldad ug kaduha nakahimo og test buy ang kapolisan.
Atol sa pagsilbi sa search warrant, ang ugangan nga babaye ni Beldad nga si Suico ang nakuhaan sab og mga drug paraphernalia sa kapolisan lakip na ang salapi nga peke kantidad og P2,000.
Nakuha sab sa kapolisan gikan ni Beldad ang unom ka gagmay ug lima ka medium size nga gituohang drugas nga dunay kantidad nga P60 mil.
Gitanggong na sa San Nicolas Police detention cell ang duha ka dinakpan nga pareho nga mag-atubang og tukmang kaso. (BANAT NEWS)